જાણો શું છે આ ક્રિપ્ટોકરન્સી અને કેવી રીતે ચાલે છે સમગ્ર વહીવટ…

હાલમાં દેશમાં કોઈપણ ક્રિપ્ટૉકરન્સીના ઉપયોગ પર કોઈ નિયંત્રણ અથવા કોઈ પ્રતિબંધ નથી. જોકે, આરબીઆઈએ ક્રિપ્ટૉકરન્સી સામે વારંવાર ચેતવણી આપતા કહ્યું છે કે આ ડિજિટલ ચલણો દેશની મેક્રોઈકૉનૉમિક અને નાણાકીય સ્થિરતા સામે ગંભીર જોખમ પેદા કરે છે અને તેમાં ટ્રૅડિંગ કરતા રોકાણકારોની સંખ્યા અને તેમની માર્કેટ વેલ્યુના દાવાઓ પણ શંકાસ્પદ છે. આ અગાઉ ક્રિપ્ટૉકરન્સી મામલે સુપ્રીમ કોર્ટે એક મોટો નિર્ણય આપ્યો જેમાં વર્ચ્યુઅલ કરન્સી મારફતે ક્રિપ્ટોકરન્સીમાં લેવડદેલડ પરથી રોક હઠાવી લેવામાં આવી હતી.

વર્ષ 2018ના રિઝર્વ બૅન્ક ઑફ ઇન્ડિયાના એક પરિપત્રને પડકારતી ઇન્ટરનેટ ઍન્ડ મોબાઇલ ઍસોસિયેશન ઑફ ઇન્ડિયાની અરજીને સુપ્રીમ કોર્ટ સ્વીકારી હતી. હવે સુપ્રીમ કોર્ટના નિર્ણયથી વર્ચ્યુઅલ કરન્સીની લેવડદેવડનો રસ્તો ખૂલી ગયો હતો. ભારતની કેન્દ્રીય બૅન્ક આરબીઆઈએ એપ્રિલ 2018માં બૅન્કોને ક્રિપ્ટૉકરન્સી મારફતે લેવડદેવડ નહીં કરવાના નિર્દેશ આપતો પરિપત્ર બહાર પાડ્યો હતો. 2018માં ડિજિટલ કરન્સી ધરાવનાર 50 લાખ યૂઝર્સ હોવોના અહેવાલ મળ્યા હતા. અને તેની ચર્ચા ત્યારે વધી હતી જ્યારે ક્રિપ્ટોકરન્સી ધારકોના રાતોરાત લાખો અને કરોડો કમાવવાના સમાચાર આવી રહ્યા હતા…

શું છે ક્રિપ્ટોકરન્સી ?

ડિજિટલ કરન્સી એક એવી મુદ્રા છે જે ઑનલાઇન હોય છે, તે સામાન્ય રીતે વપરાતી મુદ્રા, જેમ કે સિક્કા અને નોટ જેવી નથી હોતી. જોકે વિશેષ એટીએમમાંથી બિટકૉઇન ઇસ્યૂ કરાવી શકાય છે. તમે તેને વર્ચ્યુઅલ ટોકનની જેમ જોઈ શકો છો. બિટકૉઇન એક પ્રખ્યાત ક્રિપ્ટોકરન્સી છે. તેનું લૉન્ચિંગ 2009માં કરવામાં આવ્યું હતું. એ પછી તેના મૂલ્યમાં ધરખમ ફેરફારો જોવા મળ્યા હતા. બિટકૉઇન કમ્પ્યૂટર કોડથી બનેલી ડિજિટલ કરન્સી કે વર્ચ્યુઅલ કરન્સી છે. લોકો તેને ઑનલાઇન ‘કૅશ’ તરીકે પણ ઓળખે છે. એકદમ સાદા શબ્દોમાં કહીએ તો બિટકૉઇન એક કમ્પ્યૂટર ફાઇલ છે, તેનો સંબંધ કોઈ બૅન્ક કે સરકાર સાથે નથી. એટલે કે બિટકૉઇન સરકારો અથવા બૅન્કો દ્વારા નથી છાપવામાં આવતું. માઇનિંગ નામની જટિલ પ્રક્રિયાથી બિટકૉઇન ક્રીએટ કરવામાં આવે છે. દુનિયાભરમાં કમ્પ્યૂટર નેટવર્ક પર તેને મૉનિટર કરવામાં આવે છે. આ મુદ્રા કોઈ બૅન્કે બહાર પાડી ન હોવાથી તેના પર કોઈ ટેક્સ લાગતો નથી….

બિટકોઇનનો કેવી રીતે ઉપયોગ થાય ?

બિટકૉઇન ગુપ્ત કરન્સી છે અને તેને સરકારથી છુપાવીને રાખી શકાય છે. બિટકૉઇનની મદદથી તમે સામાન કે સર્વિસ માટે ચુકવણી કરી શકો છો. જોકે, બિટકૉઈન બહુ ઓછી બાબતો માટે વાપરી શકાય છે. કેટલાક દેશોમાં તો બિટકૉઇનનો વપરાશ પ્રતિબંધિત છે. બિટકૉઇન સૌથી જાણીતી ક્રિપ્ટોકરન્સી છે પરંતુ હજારો પ્રકારની ક્રિપ્ટોકરન્સીની લે-વેચ થઈ રહી છે, જેમકે રૅડ કૉઇન, સિયા કૉઇન, સિસ્કૉઇન, વૉઇસ કૉઇન અને મોનરે. બિટકૉઇન રિસીવ કરવા માટે યૂઝર પાસે બિટકૉઇન ઍડ્રેસ હોવો જરૂરી છે જે સામાન્યપણ 27થી 34 અક્ષરો અને અંકોનો બનેલો હોય છે. આ એક વર્ચ્યુઅલ પોસ્ટબૉક્સ છે જ્યાંથી બિટકૉઇનને મોકલી શકાય અને જ્યાં તેને રિસીવ કરી શકાય. આની સાથે ખરું નામ અને ઍડ્રેસ રજિસ્ટર નથી થતા, જેનાંથી કેટલાક બિટકૉઇન યૂઝર્સ ઓળખ છુપાવી શકે છે. બિટકૉઇન વૉલેટ ઍડ્રેસને સ્ટોર કરે છે અને બચતનું સંચાલન કરે છે. આ એક ખાનગી બૅન્ક એકાઉન્ટની જેમ વર્તે છે. જો ડેટા ખોવાઈ જાય તો બિટકૉઇન પણ ગુમાવી દીધા એમ કહી શકાય. જોકે વૉલેટ ખોલવા માટે આઈડી માગવામાં આવે છે. બિટકૉઇન અંગેના નિયમો પ્રમાણે બે કરોડ દસ લાખ બિટકૉઇન્સ ક્રીએટ થઈ શકે છે. જોકે એ સ્પષ્ટ નથી કે ત્યાર પછી શું થશે…

આવી ડિજિટલ મુદ્રાધારકોની ઓળખ જાહેર ન થવાથી ઇન્ટરનેટ પર ગેરકાયદેસર ખરીદી તરફ આકર્ષણ જોવા મળ્યું છે. જોકે, અમુક ક્ષેત્રમાં બિટકૉઇનને માન્યતા મળતા, ગ્રાહકોને બિટકૉઇન બદલ વસ્તુઓ અથવા સેવાઓ ખરીદવાનો મોકો મળ્યો છે. માઇક્રોસૉફ્ટ જેવી માઇક્રોસૉફ્ટ કમ્પનીએ અને ટ્રાવેલ બુકિંગ કરતી ઍક્સપીડિયાથી લઈને વિદેશમાં અમુક નાના વેપારીઓ અને રેસ્ટોરાંમાં બિટકૉઇન સ્વીકાર કરવામાં આવે છે. ટૅક્નૉલૉજીને સારી રીતે સમજી ન શકતી વ્યક્તિ પણ બિટકૉઇનનો ઉપયોગ કરી શકે છે. ઉપયોગકર્તા બિટકૉઇનને કમ્પ્યૂટર કે મોબાઇલ ફોન પર બિટકૉઇન વૉલેટ ઍપ્લિકેશન મારફત તેને ઇન્સ્ટૉલ કરી શકતા હોય છે. વૉલેટના માધ્યમથી બિટકૉઇન મોકલી શકાય છે અથવા મેળવી શકાય છે. લેવડદેવડની તમામ વિગત ‘બ્લૉક ચેઇન’માં નોંધાય છે. બ્લૉક ચેઇન એક ડેટાબેઝ સિસ્ટમ છે અને તેમાં તમામ વિગત નોંધવામાં આવે છે. આમાં પૈસાની લેવડદેવડ માટે બૅન્કની જરૂર નથી રહેતી. બિટકૉઇનના બધા જ વપરાશકારો બ્લૉક ચેઇનથી જોડાયેલા હોય છે…

 ક્રિપ્ટોકરન્સીના ફાયદા અને નુક્સાન 

આ કરન્સી માત્ર કોડમાં જ રહે છે, જેથી તેને જપ્ત પણ નથી કરી શકાતી અને તેનો નાશ પણ નથી થતો. ક્રિપ્ટોકરન્સીના કેટલાક ફાયદા છે. પહેલો અને સૌથી નાનો ફાયદો તો એ છે કે ડિજિટલ કરન્સી હોવાને કારણે તેમાં દગાબાજી થવાની શક્યતા ઓછી છે. ક્રિપ્ટોકરન્સીમાં રિટર્ન અથવા લાભ વધારે હોય છે, ઑનલાઇન ખરીદીને કારણે લેવડ-દેવડ સહેલી હોય છે. નોટબંધી અને અવમૂલ્યનની અસર નહિંવત હોય છે. પરંતુ બિટકૉઇન જેવી વર્ચ્યુઅલ કરન્સીમાં ભારે ઊથલપાથલ કેટલીક વખત ચિંતાનો વિષય બની શકે છે. અમેરિકન શૅરબજાર વૉલસ્ટ્રીટમાં ચિંતા વ્યક્ત કરવા છતાં બિટકૉઇન મારફતે લેવડદેવડની પરવાનગી છે. આ વર્ચ્યુઅલ કરન્સી છે એટલે આમા કરેલો સોદો જોખમી હોય છે….

વધુ સમાચારો ઝડપથી અને સત્ય સાથે મેળવવા માટે ” ચક્રવાત ન્યુઝ ” સાથે જોડાઓ….

👉🏻 નિચેની લિંક પર ક્લિક કરી અમારી સાથે જોડાઓ અને આ લિંકને તમારા વિસ્તારના દરેક ગ્રુપમાં share કરો….👇🏻

https://chat.whatsapp.com/Jteb7Fbl3faARzF6FQshtT